ҚАЛА ТҰРМЫСЫНЫҢ САПАСЫ – БАСТЫ БАҒДАР

№11 сайлау округі бойынша Шу аудандық мәслихатының депутаттығына кандидат Алимкулов Ерболат Бектемірұлы ауызсу жүйелерінің тұрақты жұмысына, қала шетіндегі инфрақұрылымды дамытуға, тұрғындар денсаулығын қолдауға және санитарлық жағдайды жақсартуға бағытталған сайлауалды бағдарламасын ұсынды. Кандидат алдағы бес жылда халықтың тұрмыс сапасын арттыруға арналған міндеттердің жүзеге асуына атсалысуды көздейді.

ӨМІРБАЯНЫ МЕН ЕҢБЕК ЖОЛЫ

Ерболат Бектемірұлы 1969 жылғы 1 қазанда Меркі ауданының Қостоған ауылында дүниеге келген. 1992 жылы Алматы халық шаруашылығы институтын «Экономист» мамандығы бойынша бітірген.

1995 жылдан құқық қорғау органдарында қызмет етіп, 2021 жылы зейнеткерлікке шыққан. 2022 жылдан бері «Төле би мамандандырылған көпсалалы кәсіпорны» шаруашылық жүргізу құқығындағы коммуналдық мемлекеттік кәсіпорнында заңгер болып жұмыс істейді. Үйленген, бес баласы бар.

Кандидат халық аманатын үлкен сенім әрі зор жауапкершілік деп қабылдайды. Оның ұстанымы — тұрғындармен тұрақты байланыста болып, күнделікті өмірге әсер ететін мәселелердің шешілуіне өз өкілеттігі аясында ықпал ету.

АУЫЗСУДЫҢ ҮЗДІКСІЗ БЕРІЛУІ — КҮНДЕЛІКТІ ҚАЖЕТТІЛІК

Бағдарламадағы негізгі міндеттердің бірі — ауызсумен қамтамасыз ету жүйелерінің үздіксіз әрі қалыпты жұмысын назарда ұстау. Кандидат осы салада туындайтын мәселелерді тиісті мекемелер алдында көтеріп, олардың шешілуіне атсалысуды жоспарлайды.

Сумен жабдықтау жүйесінің тұрақтылығы әрбір отбасының тұрмысына тікелей әсер етеді. Сондықтан тұрғындардан келіп түсетін ұсыныстар мен шағымдарды ескеріп, сумен қамтуға қатысты мәселелердің қаралуын депутаттық өкілеттігі шегінде бақылауда ұстау көзделген.

ҚАЛА ШЕТІ ДЕ ҚОЛАЙЛЫ ОРТАҒА ЛАЙЫҚ

Қаланың шеткі тұрғын алаптарын қажетті инженерлік-коммуникациялық инфрақұрылыммен қамтамасыз етуге атсалысу — бағдарламаның келесі бағыты. Кандидат бұл аумақтардың қажеттіліктерін назардан тыс қалдырмай, тиісті жұмыстардың жүргізілуіне ықпал етуді мақсат етеді.

Инфрақұрылым мәселелерін тұрғындардың сұранысына сүйене отырып көтеруге көңіл бөлінеді. Қала шетіндегі отбасылар үшін де күнделікті тіршілікке қолайлы жағдай жасау жалпы қалалық даму міндеттерімен сабақтас қарастырылады.

ДЕНСАУЛЫҚТЫ ҚОРҒАУ АЛДЫН АЛУДАН БАСТАЛАДЫ

Ерболат Алимкулов тұрғындардың денсаулығын нығайтуға бағытталған профилактикалық және медициналық-сауықтыру іс-шараларын қолдауды көздейді. Бұл бағытта аурулардың алдын алу мен денсаулықты сақтауға арналған бастамаларға мән беріледі.

ТАЗАЛЫҚ КОНТЕЙНЕРДЕН БАСТАЛАДЫ

Қала аумағындағы қоқыс контейнерлерінің жай-күйі, олардың уақытылы тазалануы және тұрмыстық қалдықтардың шығарылуы да назарда болады. Кандидат осы жұмыстарды бақылауда ұстап, туындаған мәселелерді жауапты ұйымдарға жеткізуді жоспарлайды.

Контейнерлердің күтімі мен қалдықтарды уақытылы шығару өзара байланысты жұмыстар ретінде қарастырылады. Мұндағы мақсат — тұрғындарға қолайлы санитарлық орта қалыптастыруға және қала тазалығын сақтауға ықпал ету.

ҰЖЫМДЫҚ ӨТІНІШ ЖАУАПСЫЗ ҚАЛМАУЫ ТИІС

Қала тұрғындарының ұжымдық өтініштері мен хаттарының уақытылы қаралуы — бағдарламаның аса маңызды бөлігі. Кандидат оларға заңнамада белгіленген мерзімде жауап берілуін өз өкілеттігі аясында қадағалауды көздейді.

Ерболат Алимкулов үшін тұрғындардың мәселесін тыңдау оны тиісті орынға жеткізумен және қаралу барысын назарда ұстаумен жалғасуы тиіс. Бағдарламаның негізгі бағдары — халық сеніміне жауапкершілікпен қарап, қаланың дамуы және тұрғындардың тұрмыс сапасын жақсартуға үлес қосу.

Дайындаған:  “Шу аудандық баспасы” ЖШС

Тапсырыс беруші: Алимкулов Ерболат Бектемірұлы

Шу аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді