ҒАНИ ҚАМБАРОВ: ЖОЛ САПАСЫ ЖӘНЕ АУЫЛДЫҢ ТҰРАҚТЫ ДАМУЫ

«Әділет» партиясынан №18 бірмандаттық аумақтық сайлау округі бойынша Жамбыл облыстық мәслихатының депутаттығына кандидат Қамбаров Ғани Шораұлы 2026–2031 жылдарға арналған сайлауалды бағдарламасын ұсынды. Онда Шу қаласы мен аудан елді мекендеріндегі жол, ауызсу, электр және газбен қамту, ауыл шаруашылығы, медицина мен білім беру мәселелеріне басымдық берілген.

Кандидат ауданның дамуы тұрғындарды күнделікті толғандыратын мәселелерді шешуден басталады деп санайды. Бағдарламада белгіленген міндеттердің даму жоспарлары мен бюджетте ескерілуіне ықпал ету, қабылданған шешімдердің орындалуын бақылау және халық алдында ашық есеп беру көзделген.

ӨМІРБАЯНЫ МЕН ТЕМІРЖОЛДАҒЫ ҚЫЗМЕТІ

Ғани Шораұлы Жамбыл облысы, Шу ауданының Алға ауылында туып-өскен. 2000 жылы Қазақ мемлекеттік көлік және коммуникация академиясын жол қозғалысын басқару мамандығы бойынша бітірген.

Еңбек жолын 2000 жылы «ҚТЖ» ҰК» АҚ-ның Шу машиналандырылған жол дистанциясы филиалында машинист көмекшісі болып бастаған. 2001–2006 жылдары осы филиалдың 40-станциясында машинист, шебер, өндіріс учаскесінің бастығы және бастықтың орынбасары қызметтерін атқарған.

2006–2020 жылдары Шу машиналандырылған жол дистанциясы филиалының директоры болған. 2023–2024 жылдары сол филиалда машинист, 2024–2025 жылдары Астанада «ҚТЖ» ҰК» АҚ-ның магистральдық желі басқармасында бас менеджер болып жұмыс істеген. 2025 жылдан бері Шу машиналандырылған жол дистанциясы филиалын басқарады.

Кандидаттың кәсіби жолы теміржол көлігімен байланысты. Оның бағдарламасында да жолдардың сапасы мен елді мекендер арасындағы көлік қатынасын жақсартуға көңіл бөлінген.

2027 ЖЫЛҒА БЕЛГІЛЕНГЕН ЖОЛ ЖӨНДЕУ

Бағдарламада 2027 жылы Шу қаласының Жиренше шешен, Тұран, Жайық, Төлебаев және Қарасу көшелерінде орташа жөндеу жұмыстарын жүргізуге ықпал ету көзделген. Аудан елді мекендері арасындағы көлік қатынасын жақсарту, қоғамдық көліктің тұрақты жүруіне және жолдардың сапалы күтіп ұсталуына жәрдемдесу де міндеттер қатарында.

Бұл ұсыныстар тұрғындардың күнделікті қатынауына қолайлы жағдай жасауға бағытталған. Жолдарға қатысты мәселелерді тиісті жоспарларда қарастыру және олардың орындалу барысын бақылау кандидат жұмысының маңызды бөлігі ретінде қарастырылады.

АУЫЗСУ, ЭЛЕКТР ЖӘНЕ ТАБИҒИ ГАЗ

Шу қаласының сумен жабдықтау мәселелерін шешуге, тозған инженерлік желілерді жөндеуге ықпал ету бағдарламаның коммуналдық бағытына енгізілген. Қала мен ауылдық елді мекендерді электр энергиясымен үздіксіз қамтамасыз ету және көшелерді жарықтандыру аясын кеңейту мәселелеріне де назар аударылады.

Шоқпар, Далақайнар, Балуан Шолақ, Бөлтірік және Бәйдібек ауылдарына табиғи газ тарту міндеті көрсетілген. Кандидат бұл мәселелерді жауапты органдар алдында көтеріп, жүзеге асуына өз өкілеттігі аясында ықпал етуді көздейді.

АУЫЛ ШАРУАШЫЛЫҒЫ МЕН КӘСІПКЕРЛІК

«Ауыл аманаты» аясында ауыл тұрғындарының жеңілдетілген несиеге қолжетімділігін кеңейтуге, жеке қосалқы шаруашылықтарды, отбасылық кәсіпкерлік пен кооперативтерді дамытуға жәрдемдесу жоспарланған.

Жайылыммен қамту, ветеринариялық инфрақұрылымды дамыту және тозығы жеткен каналдарды жөндеу мәселелері де бағдарламада қамтылған. Фермерлер мен жеке қосалқы шаруашылықтардың мүддесін қорғау, жаңа технологияларды қолдану арқылы суармалы егістік жерлердің үлесін ұлғайту ұсынылады.

Шағын бизнес, ауыл шаруашылығы өнімдерін өңдеу және инвестиция тарту арқылы тұрақты жұмыс орындарын ашуды қолдау көзделеді. Жұмыспен қамту, кәсіптік оқыту және жас кәсіпкерлерге арналған мемлекеттік шаралардың орындалуына атсалысу да назарда.

МЕДИЦИНА, БІЛІМ ЖӘНЕ ӘЛЕУМЕТТІК ҚОЛДАУ

Аудандық аурухана, ауылдық амбулаториялар мен медициналық пункттердің жабдықталуын жақсарту және шалғай ауылдарда медициналық көмектің қолжетімділігін арттыру ұсынылады. Бейінді дәрігерлер қызметіне қолжетімділік пен «Дипломмен ауылға» жобасын қоса алғанда, қолдау шаралары арқылы мамандар тарту мәселелері қамтылған.

Мектептердің материалдық-техникалық базасын нығайту және білім беру ұйымдарына баратын жолдардың қауіпсіздігін қамтамасыз етуге ықпал ету жоспарланған. 2027 жылы Шу қаласы мен аудан елді мекендерінде балалар және спорт алаңдарын дамытуға басымдық беріледі.

Қарттарға, балалы отбасыларға және мүгедектігі бар азаматтарға мемлекеттік әлеуметтік қызметтердің қолжетімділігін арттыру, әлеуметтік осал тұрғындардың тұрмысын жақсарту және аудан мекемелерінде қолжетімді орта қалыптастыру да бағдарламада көрсетілген.

БАЙЛАНЫС ЖӘНЕ АБАТТАНДЫРУ

Шалғай елді мекендерді қоса алғанда, аудан аумағында ұялы байланыс пен интернет сапасын жақсарту, қамту аясын кеңейту ұсынылады. Ауылдық мекемелерді цифрландыру мен электрондық мемлекеттік қызметтердің қолжетімділігіне де көңіл бөлінеді.

«Таза Қазақстан» аясында Шу қаласы мен аудан елді мекендерінің көшелерін абаттандыру, қалдықтарды жинау және шығару жүйесін жетілдіру, көгалдандыру және жайлы қоғамдық кеңістіктер құру көзделген.

Ғани Қамбаровтың негізгі ұстанымы — әр елді мекеннің қажеттілігін ескеріп, тұрғындардың ұсыныстарына жауапкершілікпен қарау. Оның бағдарламасы жол мен коммуналдық қызметтен бастап, ауыл экономикасы мен әлеуметтік қолдауға дейінгі мәселелерді кезең-кезеңімен шешуге ықпал етуге бағытталған.

 

Дайындаған:  “Шу аудандық баспасы” ЖШС

Тапсырыс беруші:  Қамбаров Ғани Шораұлы

Жамбыл облыстық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді