Мемлекеттің қуаты оның экономикалық әлеуетімен ғана емес, азаматтарының құқықтық сауаттылығымен, заңға деген құрметімен және қоғамдағы әділеттілік деңгейімен де айқындалады. Өйткені тұрақты дамудың басты шарты – адам құқығы қорғалған, әрбір азаматтың пікірі мен мүддесі ескерілетін орта қалыптастыру. Осы ретте Қазақстан Республикасының Конституциясы елдің құқықтық жүйесінің негізін құрайтын, қоғамдық қатынастарды реттейтін маңызды құжат болып саналады.
Конституция – мемлекеттің басқару жүйесін айқындайтын заңдық құжат қана емес, азамат пен қоғам арасындағы өзара жауапкершілікті қалыптастыратын басты бағдар. Онда бекітілген қағидаттар әр адамның құқықтары мен бостандықтарын қорғауға, қоғамдағы тұрақтылықты сақтауға және азаматтардың мемлекетке деген сенімін нығайтуға бағытталған.
Ата Заңның маңызын түсіну үшін оның күнделікті өмірдегі көрінісіне назар аудару қажет. Мәселен, әр азаматтың білім алуы, еңбек етуі, медициналық көмекке жүгінуі, өз ойын еркін білдіруі және жеке өмірінің қорғалуы құқықтық нормалармен тығыз байланысты. Бұл құқықтардың сақталуы – қоғамның өркениетті дамуының маңызды көрсеткіші.
Сонымен қатар құқық пен жауапкершілік ұғымдары бір-бірінен ажырамайды. Әр адам өз құқығын білуімен қатар, өзгелердің де құқықтары мен бостандықтарын құрметтеуі тиіс. Заң талаптарын сақтау, қоғамдық тәртіпке бағыну, өзара сыйластық пен адалдық қағидаттарын ұстану – құқықтық мәдениеттің негізгі белгілері. Мұндай ұстанымдар қоғамдағы сенімді арттырып, ортақ мақсат жолында бірлікті нығайтады.
Құқықтық мемлекет құру – тек мемлекеттік органдардың міндеті емес, барша азаматқа ортақ жауапкершілік. Заңның үстемдігін қамтамасыз ету, азаматтардың құқықтық сауаттылығын арттыру және әділеттілік қағидаттарын күнделікті өмірде басшылыққа алу арқылы ғана берік қоғамдық негіз қалыптастыруға болады.
Қорыта айтқанда, Конституцияның құндылығы оның баптарымен ғана емес, өмірде қаншалықты орындалатынымен өлшенеді. Әрбір азамат заңды құрметтеп, өз міндетіне жауапкершілікпен қарап, қоғам игілігіне үлес қосқанда ғана елдің тұрақты дамуына жол ашылады. Ата Заңға құрмет – мемлекетке құрмет, ал заң үстемдігі – әділетті қоғамның басты тірегі.
Абдуманапов Сайфидин Нуридинұлы. Шу аудандық қоғамдық кеңесінің мүшесі
