Биыл қазақ халқының мақтанышы, ерлік пен өрліктің символына айналған даңқты қолбасшы, жазушы Бауыржан Момышұлының туғанына 115 жыл толып отыр. Бұл – тек бір тұлғаның өмір жолын еске алу ғана емес, ұлттық рухтың асқақ үлгісін, отаншылдықтың биік өнегесін дәріптейтін маңызды сәт.
Бауыржан Момышұлы 1910 жылы Жамбыл облысы, Жуалы ауданында қарапайым ауылда дүниеге келді. Балалық шағынан-ақ қазақтың салт-дәстүрімен сусындап, еңбекқорлық пен адалдықты бойына сіңірді. Тәртіп пен жауапкершілікке негізделген мінезі, көшбасшылық қабілеті оны әскери қызметке жетеледі.
Ұлы Отан соғысы жылдарында оның есімі бүкіл елге танылды. Мәскеу түбіндегі шайқаста батальон командирі ретінде көрсеткен ерлігі тарихта алтын әріппен жазылды. Бауыржан басқарған жауынгерлер жау шабуылына төтеп беріп, астанаға жау табанын тигізбей, қаһармандықтың шынайы үлгісін көрсетті. Соғыстан кейін де ол әскери шеберлігімен ғана емес, тәрбиеші әрі ойшыл ретінде қалдырған мұрасымен әлемдік деңгейде танылды.
Момышұлы тек батыр қолбасшы емес, терең ойлы қаламгер болды. Оның «Арпалыс», «Ұшқан ұя», «Москва үшін шайқас» сияқты шығармалары жас ұрпаққа патриотизм мен ерліктің рухын сіңіретін асыл қазына. Әсіресе «Ұшқан ұя» туындысы қазақтың отбасылық тәрбиесі мен ұлттық болмысын шынайы суреттеп, әдебиет төрінен лайықты орын алды.
Қазақтың біртуар перзенті Бауыржан Момышұлы тәртіп пен рухани құндылықтарды жоғары қойып, «Тәртіпке бас иген құл болмайды, тәртіпсіз ел болмайды» деген қағидасымен халыққа өнеге қалдырды. Оның 115 жылдығын атап өту – жастардың жүрегіне елге, жерге деген сүйіспеншілікті ұялатудың, ұлттық рухты жаңғыртудың маңызды қадамы.
Бүгінгі тәуелсіз Қазақстан үшін Бауыржан Момышұлы – өткеннің ғана емес, бүгінгі күн мен болашақтың да қаһарманы. Оның есімі мен ерлігі қазақ халқының жадында мәңгі сақталары сөзсіз.
Жанария Касенова,
Шоқпар ауылдық кітапханашысы.
