«Өнер – халықтың жаны, ұстаз – ұлттың шамшырағы». Осы қос қасиетті бойына тоғыстырған жандардың еңбегі қашанда ел жадында сақталады. Себебі олар бір ғана мамандықтың емес, тұтас бір ұлттың рухани мұрасын келешек ұрпаққа аманаттап кетеді. Осындай өнегелі ғұмыр кешкен, өнерді өмірінің өзегіне айналдырып, саналы ғұмырын шәкірт тәрбиесіне арнаған аяулы ұстаздардың бірі – Күсеев Бөгет ағай.
Бөгет ағай – күй өнерінің қыр-сырын терең меңгерген талантты күйші, баян аспабында шебер ойнап, халық әндерін нақышына келтіріп орындайтын өнер иесі. Оның орындауындағы әр күй мен әр әннен қазақ даласының кеңдігі, халқымыздың асыл рухы сезіліп тұрады. Ол үшін өнер – жай ғана кәсіп емес, ұлттың жан дүниесін ұрпаққа жеткізетін қасиетті аманат.
Ұзақ жылдар бойы мектепте ән-күй пәнінің мұғалімі болып еңбек еткен Бөгет ағай әр сабағын тәрбиемен ұштастыра білді. Ол оқушысына тек домбыра шертіп, ән айтуды үйретумен шектелген жоқ. Әр күйдің шығу тарихын, әр әннің астарындағы ұлттық рухты түсіндіріп, өнер арқылы шәкірт жүрегіне туған елге деген сүйіспеншілікті, ұлттық құндылықтарға деген құрметті дарытты. «Домбыраның қос ішегінде тұтас халықтың тағдыры бар» дегенді өмірімен дәлелдеген ұстаздың тәлімі талай шәкірттің жүрегінен орын алды.
Мен де сол бақытты шәкірттердің бірімін. Абай атындағы орта мектептің төртінші сыныбында оқып жүргенімде алғаш рет қолыма домбыра ұстатып, күй әлемінің есігін ашқан жан – Бөгет ағай еді. Сол күннен бастап қасиетті қара домбыраның үні менің өмірімнің бір бөлшегіне айналды. Ұстаздың шәкіртіне берген ең үлкен сыйы – білім ғана емес, өмір бойы жүрегінде сақталатын рухани азық екенін мен дәл осы ағайымнан үйрендім.
Ұстаздық қызметімен қатар, Бөгет ағай Абай атындағы орта мектепте тәрбие ісі жөніндегі директордың орынбасары қызметін де абыроймен атқарды. Мектептің қоғамдық өміріне белсене араласып, мәдени-көпшілік іс-шаралардың мазмұнды өтуіне, шығармашылық ортаның қалыптасуына ерекше үлес қосты. Әріптестері үшін сенімді әріптес, шәкірттері үшін ақылшы, қамқор ұстаз бола білді. Оның сабырлы мінезі, қарапайым болмысы, адамға деген шынайы ықыласы көпшіліктің сый-құрметіне бөледі.
Зейнеткерлікке шыққаннан кейін де Бөгет ағай өнерден қол үзген жоқ. Керісінше, бар тәжірибесін кейінгі буынға арнауды өзінің азаматтық парызы санады. Аудан орталығы Төле би ауылындағы Әблахат Еспаев атындағы балалар саз мектебінде ұзақ жылдар басшылық қызмет атқара жүріп, жас өнерпаздарға домбырадан дәріс берді. Ол шәкірттеріне тек күй тартуды ғана емес, күйдің киесін, домбыраның қасиетін, халық өнерінің қадірін үйретті. Соның нәтижесінде оның тәрбиесін көрген көптеген шәкірт өнер жолын таңдап, түрлі байқауларда биік белестерді бағындырды. Ұстаз еңбегінің ең үлкен жемісі де – шәкіртінің жетістігі болса керек.
Өнер – халықтың мәңгілік мұрасы. Ал сол мұраны ұрпақтан ұрпаққа жалғайтын тұлғалар – шын мәніндегі ұлағатты ұстаздар. Бөгет ағайдың бүкіл ғұмыры осы ұлы мұратқа арналды. Оның өмір жолы – өнерге адалдықтың, ұстаздыққа беріктіктің, адамгершіліктің жарқын үлгісі.
«Ұстаздың еккен дәні – уақыт өткен сайын жемісін береді» дейді халқымыз. Бөгет ағай еккен сол рухани дән бүгінде шәкірттерінің жүрегінде көктеп, қазақ өнерінің өрісін кеңейтіп келеді. Оның есімі шәкірттерінің жүрегінде, өнерсүйер елдің жадында әрдайым құрметпен аталып, өнегелі ғұмыры кейінгі буынға мәңгілік үлгі болып қала бермек.
Батима Дайрабаева,
шәкірті.
