МАҚСАТЫМ — ЕЛІМЕ ҚЫЗМЕТ ЕТУ

№2 сайлау округі бойынша Шу аудандық мәслихатының депутаттығына кандидат Әбенов Жасұлан Әлкенұлы өзінің сайлауалды бағдарламасын ұсынады. Мұхтар Әуезов атындағы мектепте орналасқан №420 және Е. Бекмаханов атындағы мектеп-гимназиясында орналасқан №421 сайлау учаскелерін қамтитын округтен ұсынылған кандидаттың негізгі мақсаты — тұрғындардың тұрмыс сапасын жақсартуға, ауылдардың инфрақұрылымын дамытуға және әлеуметтік мәселелердің шешілуіне ықпал ету.

ӨМІРБАЯНЫ МЕН ЕҢБЕК ЖОЛЫ

Жасұлан Әлкенұлы 1970 жылғы 9 шілдеде Жамбыл облысы, Шу ауданы, Төле би ауылында, бұрынғы Новотройцкое елді мекенінде дүниеге келген. 1987 жылы ауылдағы Мұхтар Әуезов атындағы орта мектепті бітірген. 1988 жылы Шу қаласындағы №7 кәсіптік-техникалық училищені «Тепловоз машинисінің көмекшісі» мамандығы бойынша тәмамдап, еңбек жолын Шу локомотив депосында слесарь болып бастаған. 1988–1990 жылдары Кеңес Одағы Қарулы Күштерінің Қиыр Шығыс әскери округінде әскери борышын өтеген. Әскерден кейін, 1991 жылғы ақпан мен қыркүйек аралығында Шу локомотив депосында еңбек еткен.

Оның кейінгі еңбек жолы білім беру саласымен тығыз байланысты. 1991–1997 жылдары Төле би ауылындағы Мұхтар Әуезов атындағы орта мектепте бастауыш сынып мұғалімі болып жұмыс істеген. 1997–1998 жылдары осы мектеп директорының бастауыш сыныптар бойынша оқу-тәрбие ісі жөніндегі орынбасары, 1998–2000 жылдары тәрбие ісі жөніндегі орынбасары қызметтерін атқарған. 2000 жылы М. Х. Дулати атындағы Тараз мемлекеттік университетін «Қазақ тілі мен әдебиеті» мамандығы бойынша бітіріп, жоғары білім алған.

2000–2011 жылдары Мұхтар Әуезов атындағы орта мектеп директорының оқу ісі жөніндегі орынбасары болып еңбек еткен. 2011–2013 жылдары Қонаев ауылындағы Төле би атындағы орта мектепті, ал 2013–2021 жылдары Төле би ауылындағы Мұхтар Әуезов атындағы орта мектепті басқарған.

Жасұлан Әлкенұлының жергілікті өкілді органдағы жұмыс тәжірибесі де бар. 2016–2021 жылдары Шу аудандық мәслихатының депутаты, әлеуметтік сала мәселелері жөніндегі тұрақты комиссияның төрағасы болған. 2021 жылдан 2023 жылғы қаңтарға дейін аудандық мәслихаттың депутаты ретінде хатшы және төраға қызметтерін атқарған. 2023 жылдан 2026 жылғы қазанға дейін Шу аудандық мәслихатының депутаты әрі төрағасы болып жұмыс істеген. Отбасылы, бір ұл мен бір қыз тәрбиелеп отыр.

Кандидаттың сайлауалды бағдарламасында елді мекендердің күнделікті тіршілігіне тікелей әсер ететін мәселелерге басымдық берілген. Бағдарламаның негізгі бағыттары жолдардың сапасын жақсартуды, көшелерді жарықтандыруды, балаларға арналған ойын және спорт алаңдарын орнатуды, қоғамдық орындарды жаңғыртуды қамтиды. Жасұлан Әбенов депутат болып сайланған жағдайда білімі мен өмірлік тәжірибесін осы міндеттердің орындалуына жұмсауды көздейді.

Жолдарды жөндеу және көшелерді жарықтандыру

Кандидат алдағы бес жылда Төле би ауылдық округіндегі Д. Қонаев, Арай, Т. Әубәкіров, Егемберді, М. Мәметова, Т. Рысқұлов және Жақсыбай көшелерін кезең-кезеңімен орташа жөндеуден өткізуге ықпал етуді жоспарлап отыр. Ауылішілік жолдардың жағдайын жақсарту тұрғындардың қатынауына қолайлы жағдай жасап, елді мекеннің жалпы келбетіне де оң әсерін тигізеді.

Көшелерді түнгі жарықтандыру мәселесі де назардан тыс қалмаған. С. Естемесов, Қасенеев, Тәуелсіздік, Теректі және Досымбаев көшелерінде жарықтандыру жұмыстарын кезең-кезеңімен жүргізуге ықпал ету көзделген. Бұл бастама тұрғындардың кешкі уақытта жүріп-тұруына қолайлылық туғызуға және көшелердегі қауіпсіздікті арттыруға бағытталған.

Балаларға қолайлы орта және бұқаралық спорт

Балалар мен жасөспірімдердің бос уақытын тиімді өткізуіне жағдай жасау — бағдарламаның маңызды бөлігі. Осы мақсатта Мұхтар Әуезов атындағы орта мектептің қоршауын жаңарту және Аша ауылындағы балалар футбол алаңшасын қайта жаңғырту мәселелерін көтеру жоспарланған. Білім беру ұйымының аумағын талапқа сай қоршау мен спорт алаңдарының жағдайын жақсарту балаларға арналған ортаның қауіпсіз әрі қолайлы болуына ықпал етеді.

Сонымен қатар Төле би ауылындағы Т. Рысқұлов көшесіне балалар ойын алаңын және көше жаттығуларына арналған стритворкаут алаңын орнатуға қажетті қаражаттың қарастырылуына ықпал ету ұсынылады. Балуан Шолақ көшесінде шағын футбол және стритворкаут алаңдарын орналастыру мәселесі де бағдарламаға енгізілген. Мұндай нысандар балалар мен жастардың тұрғылықты жеріне жақын маңда спортпен шұғылдануына мүмкіндік береді.

Жасұлан Әлкенұлы жастар саясатын қолдауға, жасөспірімдер арасында салауатты өмір салтын қалыптастыруға және ауыл спортының өркендеуіне үлес қосуды көздейді. Бағдарламадағы ойын және спорт алаңдарына қатысты бастамалар осы мақсатпен сабақтасады.

Қоғамдық орындарды жаңғырту және ауылдарды абаттандыру

Аудан орталығындағы қоғамдық демалыс орындары мен спорт нысандарын жаңарту да кандидаттың басымдықтары қатарында. Атап айтқанда, М. Жүнісалиев атындағы саябақ пен С. Хасенов атындағы стадионды қайта жаңғыртуға ықпал ету көзделеді. Саябақтың абаттандырылуы тұрғындардың отбасымен демалуына қолайлы орта қалыптастырса, стадионның жаңартылуы бұқаралық спортты дамытуға қосымша мүмкіндік береді.

Бағдарламада тозығы жетіп, пайдаланылмай тұрған ғимараттарды жөндеу және оларды тұрғындардың қажеттілігіне қарай қайта пайдалануға беру мәселесі де қамтылған. Кандидат мұндай нысандарды халық игілігіне жаратуға бағытталған жұмыстарға ықпал етуді мақсат етеді. Бұл ұсыныс ауылдардың инфрақұрылымын дамыту, көріктендіру және абаттандыру жөніндегі міндеттермен тығыз байланысты.

Әлеуметтік қолдау және ортақ жауапкершілік

Әлеуметтік қолдау мәселелеріне де айрықша көңіл бөлінген. Кандидат соғыс және еңбек ардагерлеріне, зейнеткерлерге, мүгедектігі бар азаматтарға және көпбалалы отбасыларға мүмкіндігінше қолдау көрсетуге ниетті. Бұл бағыттағы ұстанымы — тұрғындардың қажеттіліктерін ескеріп, әлеуметтік мәселелердің шешілуіне атсалысу.

Жасұлан Әбенов ел Президенті Қасым-Жомарт Тоқаевтың бастамаларын, мемлекеттік реформалар мен стратегиялық бағдарламаларды қолдайтынын білдіреді. Сондай-ақ Үкімет пен «Әділет» партиясы жүргізіп отырған саясаттың және партияның сайлауалды бағдарламасында белгіленген міндеттердің жүзеге асуына үлес қосуды көздейді.

Кандидаттың бағдарламасында көрсетілген бастамалардың барлығы тұрғындардың күнделікті өміріне қатысты нақты қажеттіліктерге бағытталған. Жолдарды жөндеу, көшелерді жарықтандыру, спорт алаңдарын жаңарту, қоғамдық орындарды абаттандыру және әлеуметтік қолдауды қажет ететін азаматтардың мәселелеріне көңіл бөлу — оның алдағы қызметінің негізгі басымдықтары.

Жасұлан Әлкенұлы ауылдардың өмірін жақсарту мен өзекті мәселелерді шешу тұрғындардың қолдауы және бірлескен жұмыс арқылы жүзеге асатынына сенеді. Оның сайлауалды бағдарламасының негізгі ұстанымы — ел сенімін жауапкершілікпен қабылдап, туған өлкенің дамуына білімін, тәжірибесін және күш-жігерін арнау.

«Мақсатым — егемен еліме қызмет ету!»

 

Дайындаған:  “Шу аудандық баспасы” ЖШС

Тапсырыс беруші: Әбенов Жасұлан Әлкенұлы

Шу аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді.