БІЛІМ МЕН ЖАСТАРДЫ ҚОЛДАУ – БАСТЫ БАҒЫТ

№1 бірмандаттық аумақтық сайлау округі бойынша Шу аудандық мәслихатының депутаттығына кандидат Берденов Бауыржан Райымкулович өзінің 2026–2031 жылдарға арналған сайлауалды бағдарламасын ұсынды. Бағдарламада білім беру ұйымдарының жағдайын жақсарту, балалар мен жастардың дамуына жағдай жасау, жас мамандарды қолдау және тұрғындардың өтініштерін шешуге ықпал ету негізгі бағыттар ретінде белгіленген.

Өмірбаяны және еңбек жолы

Берденов Бауыржан Райымкулович 1972 жылғы 3 тамызда Жамбыл облысы, Шу ауданы, Төле би ауылында дүниеге келген.

Еңбек жолын 1996 жылы кәсіпкерлік саласында бастаған. Содан бері жеке кәсіпкер ретінде еңбек етіп, жергілікті тұрғындардың тұрмыс-тіршілігі мен кәсіпкерлік ортаның ерекшеліктерін жақсы танып келеді. Отбасылы, үш баланың әкесі.

Кандидаттың сайлауалды бағдарламасы округ тұрғындарының күнделікті өміріне тікелей қатысты әлеуметтік мәселелерді қамтиды. Негізгі ұстанымдардың бірі – тұрғындардың ұсыныстары мен қажеттіліктерін ескеріп, көтерілген мәселелердің тиісті органдарда қаралуына ықпал ету. Кандидат депутаттық қызметтің ашықтығы мен жауапкершілігіне мән беріп, атқарылған жұмыстар туралы сайлаушыларға жүйелі ақпарат беруді жоспарлап отыр.

Білім беру нысандарын қолдау

Кандидат округ аумағындағы мектептер мен балабақшалардың жағдайын жақсарту мәселелерін жергілікті атқарушы органдар алдында көтеруді жоспарлап отыр. Оқу орындарының материалдық-техникалық базасын жаңарту, жөндеу жұмыстарының сапасын бақылау және балалар үшін қауіпсіз әрі қолайлы жағдай қалыптастыру – бағдарламаның маңызды бағыттарының бірі.

Балалар мен жастардың дамуы

Бағдарламада балалардың сапалы білім алуымен қатар, бос уақытын тиімді өткізуіне де мән берілген. Спорт секцияларының, шығармашылық және білім беру үйірмелерінің қолжетімділігін арттыру, балалар мен жасөспірімдерді спортқа, өнерге және қоғамдық белсенділікке тарту жөніндегі бастамаларды қолдау ұсынылған.

Жас мамандарға қолдау

Жас мамандардың әлеуметтік мәселелерін шешуге ықпал ету де кандидат бағдарламасынан орын алған. Берденов Бауыржан Райымкулович жас кадрларды қолдау, олардың еңбек етуіне және ауылда тұрақтап қалуына жағдай жасауға қатысты мәселелерді тиісті мемлекеттік органдардың алдына қоюды көздейді.

Патриоттық тәрбие және қоғамдық белсенділік

Өскелең ұрпақты отансүйгіштік рухта тәрбиелеу, туған жерге деген жауапкершілік пен құрметті қалыптастыру мақсатында қоғамдық іс-шаралар, кездесулер және тәрбиелік бағыттағы бастамаларды қолдау қарастырылған. Кандидат жастардың қоғамдық өмірге белсенді араласуына жағдай жасауды маңызды міндеттердің бірі деп санайды.

Тұрғындармен тұрақты байланыс

Кандидат депутат болып сайланған жағдайда, сайлаушылармен тұрақты кездесулер өткізіп, тұрғындардан түскен өтініштер мен ұсыныстарды жинақтап, оларды тиісті мекемелерге жеткізуді жоспарлап отыр. Сонымен қатар өтініштердің қаралу барысын бақылауға, жауапты мекемелермен өзара жұмыс жүргізуге және көтерілген мәселелердің заң аясында шешім табуына ықпал етуге ниетті.

Берденов Бауыржан Райымкуловичтің сайлауалды бағдарламасында білім беру саласын қолдау, балалар мен жастардың дамуына жағдай жасау, жас мамандардың мәселелеріне назар аудару және тұрғындармен ашық байланыс орнату негізгі міндеттер ретінде айқындалған.

Дайындаған:  “Шу аудандық баспасы” ЖШС

Тапсырыс беруші: Берденов Бауыржан

Шу аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді