Қоғамда әділдік пен құқықтың сақталуын қамтамасыз ететін маңызды тұлғалардың бірі – судья. Бұл мамандық – жоғары жауапкершілікті, терең білімді және адами қасиеттерді талап ететін аса мәртебелі қызмет. Судья – тек заңның ғана емес, ар мен ұяттың, адамгершіліктің таразысы.
Судьяның басты міндеті – сот төрелігін әділ жүргізу. Ол азаматтардың құқықтары мен бостандықтарын қорғау, заңның үстемдігін қамтамасыз ету арқылы қоғамдағы тұрақтылық пен сенімділікті қалыптастырады. Судья өз шешімдерін тек заңға және ішкі сеніміне сүйене отырып қабылдауы тиіс. Сондықтан бұл маман иесіне жоғары кәсіби дайындықпен қатар, адалдық, әділеттілік, сабырлылық пен мейірімділік сияқты қасиеттер қажет.
Қазақстан Республикасының Конституциясында сот билігі – мемлекеттік биліктің дербес тармағы ретінде бекітілген. Судьялардың тәуелсіздігі мен қауіпсіздігі заңмен қорғалады. Бұл олардың шешім қабылдауда ешқандай сыртқы ықпалға бағынбай, тек қана заң аясында әрекет етуіне мүмкіндік береді.
Судья мамандығына тек білімді ғана емес, сонымен қатар парасатты, әділетті жандар лайық. Себебі бұл қызмет қоғам алдындағы үлкен жауапкершілікті арқалайды. Әрбір шешім адам тағдырына тікелей әсер етуі мүмкін. Сондықтан судьялардың кәсібилігі мен адамгершілігі – ел болашағының кепілі.
Қорыта айтқанда, судья – заң мен әділдіктің символы. Бұл мамандық иелері ел ішіндегі тыныштық пен тәртіптің сақталуына, құқықтық мемлекет қағидаларын нығайтуға зор үлес қосады. Судья болу – үлкен құрмет әрі үлкен жауапкершілік. Сол себепті де бұл мамандықты “мәртебелі” деп толық айтуға болады.
З.Джаркимбаева,
Шу аудандық сотының
судьясы.
