Жыл сайын 9 мамыр күні Қазақстан халқы Ұлы Отан соғысындағы Жеңіс күнін ерекше ықыласпен атап өтеді. Бұл – тарих бетінде мәңгі жазылған, бейбіт өмірдің, ерліктің, отансүйгіштіктің, адамгершілік пен әділеттіліктің жеңісі болған күн. 1941–1945 жылдардағы Екінші дүниежүзілік соғыс – адамзат тарихындағы ең қасіретті, ең қанқұйлы соғыстардың бірі болды.
Бұл соғысқа миллиондаған адам қатысты, олардың қатарында 1 миллион 200 мыңнан астам қазақ жауынгері де болды. Қазақ халқы соғыс жылдары үлкен қайсарлық пен батырлық танытты. Майданға ер-азаматтар ғана емес, әйелдер мен жастар да қатысты. Олар тек қарумен ғана емес, тылдағы қажырлы еңбегімен де Жеңіске үлес қосты. Қазақтың батыр ұл-қыздары – Бауыржан Момышұлы, Талғат Бигелдинов, Қасым Қайсенов, Әлия Молдағұлова, Мәншүк Мәметова сынды ержүрек жауынгерлердің есімі ел жадында мәңгі сақталады. Соғыс жылдары ауыл шаруашылығы мен өнеркәсіп саласында еңбек еткен аналар мен балалардың еңбегі де орасан зор. Олар күн-түн демей жұмыс істеп, майданды азық-түлікпен, киім-кешекпен және қару-жарақпен қамтамасыз етті. Халықтың бірлігі мен жанқиярлығы Жеңіске жетудің басты себептерінің бірі болды.
Ұлы Жеңіс – бұл тек соғыс аяқталған күн ғана емес, бұл – ерлік пен батырлықтың, ел мен жерге деген шексіз сүйіспеншіліктің мәңгілік символы. Бұл – бүгінгі тәуелсіздіктің бастауында тұрған тарихи белес. Біз бүгінгі бейбіт өміріміз үшін сол кездегі батырлар мен қарапайым халыққа қарыздармыз.
Бүгінде ардагерлердің қатары сиреп бара жатыр. Сол себепті олардың ерлігін ұмытпай, кейінгі ұрпаққа жеткізу – біз үшін үлкен міндет. Мектептерде патриоттық тәрбие беру, ардагерлерге құрмет көрсету, олардың естеліктерін сақтау – бұл болашақтың бейбіт болуы үшін қажет. Жастарымыз тарихты біліп, ерлікке тағзым ете білуі керек.
Ұлы Жеңіс – ұрпаққа аманат. Бұл күн – жауынгерлер рухына тағзым етіп, елге, жерге деген сүйіспеншілікті оятатын ұлы мереке. Әрбір азамат бейбітшілікті, тәуелсіздікті, тыныш өмірді қадірлей білуі тиіс. Себебі бұл – миллиондаған адамның жанымен келген қастерлі жеңіс.
Аида Берденова,
аудандық музей меңгерушісі.
