Жапонияның Айчи–Нагоя қалаларында ХХ жазғы Азия ойындары өтіп жатыр. 19 қыркүйекте басталған құрлықтық дода 4 қазанға дейін жалғасады. Биылғы бәсекеге Азияның үздік спортшылары қатысып, спорттың көптеген түрінен жүлделер сарапқа салынуда.
Қазақстан ұлттық құрамасы да Азиадада лайықты өнер көрсетіп, ел қоржынына бірқатар жүлде салды. 30 қыркүйектегі жарыстар аяқталғаннан кейін Қазақстан құрамасының еншісінде 9 алтын, 16 күміс және 31 қола, барлығы 56 медаль болды.
Қазақстандық спортшылардың алғашқы күндердегі ең жарқын нәтижелерінің бірі – велошабандоз Рината Сұлтанованың жеңісі. Ол жекелей уақытқа жарыста топ жарып, Қазақстанның Азиада-2026-дағы алғашқы алтынын иеленді.
Ал тәжірибелі велошабандоз Алексей Луценко Азиада тарихындағы ерекше көрсеткішке қол жеткізді. Ол Айчи–Нагоя ойындарында алтын медаль жеңіп, Азия ойындарының алты дүркін чемпионы атанды. Бұл нәтиже оны Азиада тарихындағы рекорд иелерінің қатарына қосты.
Гимнастикада Милад Карими ерлер арасындағы еркін жаттығуда күміс жүлдеге ие болды. Бұл – Қазақстанның аталған бағдарлама бойынша 32 жылдан кейін алған алғашқы күмісі.
Семсерлесуден 19 жастағы Кирилл Проходов та күміс медаль еншіледі. Жас спортшы финалда екі дүркін Олимпиада чемпионы, жапониялық Коки Каномен тартысты бәсекеде 13:15 есебімен жеңілді. Ескек есу спортында Қазақстан құрамасы да жоғары нәтиже көрсетті. Владислав Яковлев пен Иван Чернухин академиялық ескек есуден чемпион атанса, Сергей және Тимофей Емельяновтар каноэде қола жүлдеге ие болды. Әйелдер арасындағы байдаркадан Қазақстан командасы да қола медаль жеңіп алды.
Дзюдодан Абиба Әбужақынова күміс медаль иеленіп, Қазақстан қоржынына кезекті жүлдені қосты. 30 қыркүйекте ұлттық құрама спортшылары бір күннің өзінде екі күміс және алты қола медаль жеңіп алды.
Ауыр атлетикада Аянат Жұмағали 77 келіге дейінгі салмақта күміс жүлдегер атанды. Ал нысана көздеуден Париж Олимпиадасының қола жүлдегері Ислам Сәтпаев та үшінші орыннан көрінді.
Қазақстан спортшылары үшін Азиада-2026 әлі аяқталған жоқ. Отандастарымыз күрес, дзюдо, теннис, джиу-джитсу, велоспорт, регби, көркем гимнастика және басқа да спорт түрлерінен жарысты жалғастырады. Әсіресе, күрестен Демеу Жадыраев, Ислам Евлоев және басқа да спортшылардың бәсекелері жанкүйерлер назарында болмақ.
Осылайша, Айчи–Нагояда өтіп жатқан Азия ойындары қазақстандық спортшылардың шеберлігі мен табандылығын тағы бір мәрте көрсетіп келеді. Құрлықтық дода аяқталғанға дейін ел қоржынының жаңа жүлделермен толығатыны сөзсіз.
«Шу өңірі» ақпараты.
