Ұлыстың ұлы күніне орай тойланатын әрбір күннің өзіндік мәні мен тәрбиелік маңызы бар. Солардың бірі – Ынтымақ күні. Бұл күн – адамдарды бірлікке шақырып, татулықты дәріптейтін, қоғамдағы өзара сыйластық пен түсіністіктің маңызын айқындайтын ерекше күн. Қазақ халқы ежелден «Бірлік бар жерде – тірлік бар», «Ырыс алды – ынтымақ» деп бекер айтпаған. Өйткені ынтымақ бар жерде береке болады, ал татулық орнаған жерде елдің еңсесі биік болады. Ынтымақ күні адамдарды бір-біріне жақындастырып, көрші-қолаңмен, ағайын-туыспен арадағы сыйластықты нығайтуға үндейді. Бұл күні адамдар бір-біріне ақ тілектер айтып, реніштерін ұмытып, татуласуға тырысады. Өйткені Наурыз – өкпе-ренішті кешіріп, жаңа өмірді ақ ниетпен бастайтын мейрам.
Ынтымақ күнінің маңызы бүгінгі қоғам үшін тіпті ерекше. Қазіргі уақытта адамдардың өмірі қарбаласқа толы, әркім өз тіршілігімен әуре болып жүріп кейде бір-біріне көңіл бөлуге уақыт таппай жатады. Ал дәл осындай мерекелер адамдарды жақындастырып, бір дастархан басында бас қосуға мүмкіндік береді. Мәселен, ауыл-аймақтарда Наурыз мерекесі кезінде көршілер бірігіп үлкен қазан көтеріп, Наурыз көже дайындайды. Жастар үлкендерге көмектесіп, қариялар ақ батасын береді. Осындай қарапайым көріністердің өзі адамдар арасындағы бауырмалдықты арттырып, ынтымақты күшейтеді. Өмірде ынтымақтың қаншалықты маңызды екенін күнделікті тіршіліктен де байқауға болады. Мысалы, бір ауылда үй салайын деген отбасыға көршілері жиналып, асар жасап көмектеседі. Бір күннің ішінде қабырғасы көтеріліп, шаңырағы тігіледі. Мұндай кезде адамдардың бір-біріне деген жанашырлығы мен қолдауы айқын көрінеді. Сол сияқты қиын жағдайға тап болған отбасыларға ауыл тұрғындарының бірігіп көмектесуі – қазақ халқының ежелден келе жатқан ынтымағының жарқын дәлелі.
Ынтымақ тек ауылда ғана емес, қоғамның барлық саласында қажет. Мектепте де, жұмыста да, отбасында да татулық пен түсіністік болған жерде береке болады. Мысалы, мектепте мұғалімдер мен оқушылар бір-бірін құрметтеп, бір мақсатта еңбек етсе, білім ордасының жетістігі артады. Сол сияқты бірлігі жарасқан ұжым әрқашан үлкен нәтижелерге қол жеткізеді.
Бүгінде Қазақстан – түрлі ұлт пен ұлыстың ортақ шаңырағына айналған мемлекет. Әртүрлі мәдениет пен дәстүрге ие халықтардың бір елде татулықта өмір сүруі – үлкен жетістік. Мұның бәрі халық арасындағы ынтымақ пен өзара құрметтің арқасы. Сондықтан Наурыз мейрамындағы Ынтымақ күні – тек ұлттық мереке ғана емес, елдегі бейбітшілік пен достықтың символы.
Жалпы Ынтымақ күні – адамдарды жақсылыққа, бірлікке және бауырмалдыққа үндейтін маңызды күн. Бұл күн әрбір адамға татулықтың қадірін түсіндіріп, бір-біріне мейіріммен қарауға шақырады. Өйткені елдің күші – оның бірлігінде. Бірлігі бекем, ынтымағы жарасқан халықтың болашағы да жарқын болмақ. Наурыздың нұры әр шаңыраққа құт-береке әкеліп, халқымыздың татулығы мен ынтымағы мәңгі жасай берсін.
Балнұр Жексенбекқызы.
