ҚАЛА КЕЛБЕТІ МЕН ТҰРҒЫНДАР ИГІЛІГІ

№13 сайлау округі бойынша Шу аудандық мәслихатының депутаттығына кандидат Шәймерден Айбек Талғатұлы тұрғын үйлерді жаңғырту, аулалар мен қоғамдық орындарды абаттандыру, білім және спорт нысандарын дамытуға бағытталған сайлауалды бағдарламасын ұсынды. Алдағы бес жылға арналған міндеттерде нақты көшелер мен нысандарға қатысты ұсыныстар, жастарды және әлеуметтік көмекке мұқтаж тұрғындарды қолдау шаралары қамтылған.

ӨМІРБАЯНЫ МЕН ЕҢБЕК ЖОЛЫ

Айбек Талғатұлы 1991 жылғы 28 қаңтарда Шымкент қаласында дүниеге келген. 2012 жылы Әл-Фараби атындағы Қазақ ұлттық университетін «География және туризм» мамандығы бойынша бітірген.

Еңбек жолын 2014 жылы Алматы қаласы Медеу ауданының ішкі істер басқармасы тергеу бөлімінде тергеуші болып бастаған. Осы қызметті 2016 жылға дейін атқарған.

2017 жылдан бері кәсіпкерлікпен айналысады. Жамбыл облысы, Шу ауданындағы «Айбек» жауапкершілігі шектеулі серіктестігінің басшысы. Үйленген, төрт бала тәрбиелеп отыр.

Кандидат туған өлкенің көркеюіне қызмет етуді азаматтық парызы санайды. Оның ұстанымы — тұрғындар көтерген мәселелерге назар аударып, сайлаушылар сенімін жауапкершілікпен ақтау.

ҮЙДІ ЖАҢҒЫРТУДАН – ЖАЙЛЫ АУЛАҒА

Бағдарламада Бекбосынов көшесі бойындағы көппәтерлі тұрғын үйлерді жаңғыртуға қажетті қаражаттың бөлінуіне ықпал ету көзделген. Үйлерге апаратын кіреберіс жолдарды жөндеу мен аулаларды абаттандыру жұмыстарының сапасын депутаттық өкілеттік аясында бақылауда ұстау жоспарланған.

Балалар ойын алаңшасын салуға және көше жарықтандыру жүйесін орнатуға қаржы қарастыру мәселелері де қамтылған. Бұл міндеттер тұрғындардың күнделікті өміріне қолайлы әрі қауіпсіз орта қалыптастыруға бағытталған.

ТҮЙЕБЕКОВ КӨШЕСІНДЕГІ ЖАЯУ ЖОЛ

Айбек Шәймерден Түйебеков көшесіне жаяу жүргіншілер жолын салуға қаражат бөлінуіне ықпал етуді жоспарлайды. Бұл ұсыныс көше бойымен қатынайтын тұрғындарға қолайлы жағдай жасауға арналған.

Жаяу жол салу қаланы абаттандыру міндеттерімен сабақтасады.

САЯБАҚ ПЕН СТАДИОНҒА ЖАҢА СЕРПІН

Теміржолшылар саябағын жаңғыртуға және абаттандыруға қаражат бөлінуіне атсалысу — бағдарламаның нақты міндеттерінің бірі. Қоғамдық демалыс орнын жақсарту тұрғындардың бос уақытын мазмұнды өткізуіне жағдай жасаумен сабақтасады.

«Локомотив» стадионын жаңғыртуға қаржы бөлінуіне ықпал ету де көзделген. Кандидат құрылыс-жөндеу жұмыстарының сапалы әрі уақытылы жүргізілуін бақылауда ұстауды жоспарлайды.

Жастарға қолайлы демалыс орындарын ашуға, спорттық жарыстар мен мерекелік шараларды тұрақты өткізуге ықпал ету осы бағытты толықтырады.

МЕКТЕПТЕРДІ ДАМЫТУҒА ҚОЛДАУ

Білім беру инфрақұрылымына қатысты екі ұсыныс белгіленген: Абай атындағы мектепке жапсарлас құрылыс және А. Байтұрсынов атындағы гимназияға жаңа ғимарат салуға қаражат бөлінуіне ықпал ету.

ҚАМҚОРЛЫҚ ПЕН ҚҰҚЫҚТЫҚ САУАТ

Айбек Шәймерден әлеуметтік көмекке мұқтаж отбасылар мен қарттардың жағдайын жеке назарда ұстауды жоспарлайды. Жастардың белсенділігі мен азаматтық жауапкершілігін қалыптастыруға бағытталған еріктілер және қоғамдық бастамаларды қолдау да бағдарламаға енгізілген.

Тұрғындардың құқықтық білімін арттыру үшін кездесулер мен түсіндіру жұмыстарын жүргізу көзделеді. Сонымен қатар қоқыс шығаруды жүйелеу, аумақтарды тазалау және көркейту мәселелерін шешуге атсалысу ұсынылады.

Кандидат үшін тұрғындардың сенімі — нақты міндеттерді орындауға деген жауапкершілік. Бағдарламасының негізгі бағдары — қаланың келбетін жақсартуды халықтың күнделікті тұрмысымен ұштастырып, көтерілген мәселелердің шешілуіне ықпал ету.

Дайындаған:  “Шу аудандық баспасы” ЖШС

Тапсырыс беруші: Шәймерден Айбек Талғатұлы

Шу аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді.