Қоғамның қай ісінде болмасын алдыңғы шептен табыла білген жастардың алып тірлігін, қауқарлығын жұртшылық бүгінде мақтаумен көмкеріп, ризашылықтарын білдіруде. Белсенді буын өкілдеріне деген ыстық ықыласты арнайы датамен белгіленген атаулы күннің жыл сайын өз деңгейінде тойланатынынан байқауға болады.
12 тамыз – Халықаралық Жастар күні мерекесіне дейін ауданда жастар арасында кең көлемдегі, ерекше форматтағы түрлі шаралар, спорттық жарыстар, қызықты ойындар ұйымдастырылып, атаулы мереке күні Шу қаласындағы «Теміржолшылар» саябағында барша белсенді жастардың басын біріктірген, сый-құрметке бөлеген шара өткізілді. Аудан әкімдігі ішкі саясат бөлімінің қос бірдей Жастар ресурстық орталықтары ұйымдастырған кешке аудан әкімінің орынбасары Найман Сұлтанбаев қатысып, мерекемен құттықтады.
– Жастар мемлекетіміздің жаңа келбетін қалыптастыратын белсенді буын өкілдері. Жастарсыз ел дамымайды, танылмайды. Себебі жастар ар мен өр намыстың символы. Сондықтан қоғамның тұрақтылығын сақтау, халықтың бірлігін нығайту, тәуелсіздікті тұғырлы етуде сіздердің рөлдеріңіз маңызды. Мерекелеріңіз құтты болсын. Біз сіздердің зор жетістіктерге қол жеткізіп, биік белестерді бағындыра беретіндеріңізге сенім артамыз. Аудан атын асқақтата беріңіздер, – деді құттықтау сөзінде Найман Кенжеханұлы.
Осыдан кейін өңірдің жалынды жастары аудан әкімінің Құрмет грамотасымен және Алғыс хатымен марапатталды. Одан бөлек, мереке қарсаңында өткізілген онкүндік шаралар барысында үздіктер қатарынан табылған жастарға дипломдар мен сый-сияпаттар табысталды.
Шара соңында өңір өнерпаздары ән мен биден шашу шашып, мерекелік көңілді еселей түсті.
Балнұр Жексенбекқызы.
