Елімізде тамыздың соңғы жексенбісінде шахтерлар күні тойланады. Тамыры терең кәсіби мереке – экономиканың табысты дамуының кепілдігі саналатын ауыр бейнет иелеріне құрмет көрсетілетін күн. Аса қауіпті әрі құрметті мамандық адамнан төзімділік пен тәуекелшілдікті, шынайы жанкештілікті талап етеді.
Шу ауданында «Қазақмыс корпорациясы» ЖШС-не қарасты қос кеніш өз жұмысын жүргізіп жатқанынан аудан тұрғындары хабардар. «Шатыркөл» кенішінің шежіресі ертеден басталса, «Жайсан» кенішіндегі жұмыстың басталғанына бес жылдың жүзі болды.
Шахтерлардың кәсіби мерекесі қарсаңында «Қазақмыс корпорациясы» ЖШС бірқатар іс-шаралар ұйымдастырып, атаулы күнді айрықша құрметпен қарсы алды. Кеншілерді төл мерекесімен құттықтауға Жамбыл облысы әкімдігінің кәсіпкерлік және индустриалды-инновациялық дамыту басқармасының басшысы А.Сейсебаев, облыстық мәслихаттың кәсіпкерлікті, өнеркәсіпті, құрылысты, көлік және коммуналдық саланы дамыту мәселелері жөніндегі тұрақты комиссияның төрағасы М.Шалқарбеков, Шу ауданы әкімі Б.Жәнібеков арнайы барды. Салтанатты сәт «Жайсан» кенішінде өткізілді.
Мереке иелерінің алдында сөз алған Бақытжан Оразалыұлы қайла ұстаған қайсар жандарға жылы лебізін жеткізді.
-Шахтер мамандығы – тәуекелді талап ететін жұмыс. Бұл іске білекті және жүректілердің ғана тісі батады. Сондықтан тау мен тастың тамырын қазған сіздерге айтар алғысымыз, көрсетілер құрметіміз шексіз. Бүгінгі төл мерекелеріңіз қарсаңында сіздермен қауышып тұрғаныма қуаныштымын. Биыл Жұмысшы мамандықтар жылы болғандықтан әрбіріңізді өскелең ұрпаққа үлгі етіп көрсетуге әбден болады.
«Қазақмыс корпорациясы» ЖШС Шу өңіріндегі табиғи байлықты игеріп қана қоймай, әлеуметтік міндеттерді жауапкершілікпен көтеріп келеді. Қазіргі таңға дейін компания терең су ұңғымасын бұрғылап, көктемгі су тасқынының алдын алу үшін су бұру арнасын салды. Сонымен қатар ондаған шақырым жол жөнделіп, бірнеше ауылдарда спорт алаңдары бой көтерді, – деді аудан басшысы.
Салтанатты жиын барысында облыстан келген меймандармен қатар «Zhanashyr Project (Жанашыр Прожект)» ЖШС директоры А.Түктібаев, «Қазақмыс корпорациясы» ЖШС бас директордың орынбасары Ж.Құлмурзин, «Шатыркөл-Жайсан» тау-кен байыту кешенінің бас директоры Ж.Б.Сматаев, «Шатыркөл» кенішінің директоры Б.Е.Қоңыров, Шатыркөл байыту фабрикасы директорының орынбасары Е.Зарипов сөз алып, ізгі лебіздерін білдірді.
Құттықтаудан соң кезек марапаттауға беріліп, сала қызметкерлеріне Жамбыл облысының Құрмет грамоталары мен облыс әкімдігінің марапаттары, аудан әкімінің Құрмет грамотасы мен Алғыс хаттары тапсырылды. Компания мен серіктестік басшылары да озық қызметкерлеріне құрмет көрсетті.
Дәл осы күні шахтерлар мерекесіне орай спорттық сайыстар мен мерекелік шара ұйымдастырылды. Арнайы ақ дастархан жайылды. Жүзден жүйрік шыққандарға бағалы сыйлықтар мен дипломдар табыс етілді.
Мемлекет басшысы Қасым-Жомарт Тоқаев шахтерлардың еңбегіне ұдайы жоғары баға беретіні мәлім. Биыл «Zhanashyr Project (Жанашыр Прожект)» ЖШС–нің төрт қызметкері Қазақстан Республикасының «Кенші даңқы» төсбелгісіне ие болғанын атап өткен абзал.
Байжан Емберді.
