Кәсіпкерлік саласын әркез алдыңғы орынға қоятын ел Президенті Қасым-Жомарт Тоқаев: «Мемлекет бизнестің дамуы үшін барынша қолайлы жағдай жасайды және жеке меншіктің толық қорғалуын қамтамасыз етеді. Бизнестің жеке бастамаларына барынша қолдау көрсету қажет» деп атап өткен болатын. Расында соңғы жылдары елімізде кәсіп бастаймын деген жандарға мемлекет тарапынан жан-жақты жағдай жасалуда. Соның бірі – ісін жаңа бастаған кәсіпкерлерге бизнес ашуға, өндірісті жолға қоюға, дамытуға, сол арқылы өзін тұрақты табыспен қамтамасыз етуге мүмкіндік беретін қайтарымсыз негіздегі грант. Бұл бағдарлама әсіресе осал топтағы азаматтардың кәсіп меңгеріп, оны домалатуына өте тиімді. Яғни, грантты мүмкіндігі шектеулі азаматтар, «қандас» мәртебесі бар адамдар, өңіраралық қоныс аударушылар, аз қамтылған отбасы мүшелері, көпбалалы отбасылар, ерекше бала тәрбиелеп отырғандар, асыраушысынан айырылу бойынша жәрдемақы алып отырған жандар алуға толықтай құқылы.
Биыл қайтарымсыз грант соммасы 1572 800 теңгені (400 АЕК) құрап отыр. Аудан бойынша ағымдағы жылы 89 азаматқа грант беру жоспарланып, соның ішінде жыл басынан бүгінге дейін 44 азаматтың кәсіп ашуына жағдай жасалған.
Бүгінгі мақаламызда біз мемлекеттің қолдауы арқылы кәсіп ашып, оны бір жарым жылдан бері дөңгелетіп отырған жерлесіміз Фариза Ермекқызы Төлеген жайында айтатын боламыз.
1995 жылы Шу қаласында өмірге келіп, өсіп-өнген Фариза бүгінде төрт баланың анасы. Жастай тұрмыс құрған Фариза компьютер бағдарламашысы мамандығы бойынша жоғарғы оқу орнын тәмамдағанымен, бала тәрбиесін алға қойып он жылға жуық ешбір жерде жұмыс жасамаған екен. Десе де, отбасының ұйытқысы бола білген Фариза дастарханын түрлі дәмге толтырып, келген кісіге ұсынғаны көңілден шығып, кейіннен жартылай дайын өнім жасауға таныстарынан тапсырыс түсе бастаған. Осылайша қолынан бал тамған Фариза тағамдарын табыс көзіне айналдыра білді. Иә, аспазшының кәсіп бастауға деген ынтасы дәл осыдан бастау алған.
– Қазір әлеуметтік желінің дамыған заманы ғой, бірде инстаграм парақшасын қарап отырып өзім секілді жартылай дайын өнімнен табыс тауып отырған адамның қайтарымсыз грант ұтып, кәсіп ашып жатқанын көзім шалып қалды. Маған да бірден ой келді. Екінші күні-ақ аудандағы «Мансап» орталығына өтініш өткізіп, мамандардың түсіндіруімен құжат тапсыруға кірісіп кеттім. Ниетіме орай құжаттарым қабылданып, 14 күн арнайы мамандардан білім үйреніп, сертификат алып, комиссия алдында бизнес жоспарымды қорғадым. Комиссия жоспарымды мақұлдағаннан кейін 1 млн 478 мың теңге ұтып алдым. Қайтарымсыз берілген қаржыға жартылай дайын өнімге ең қажетті құрылғыларды сатып алып, кәсібімді бастап кеттім. Жалпы мемлекет ұсынған бұл бағдарлама кәсіп ашуға талаптанып, бірақ қаржының жоқтығы қолын байлап отырғандарға үлкен көмек, – дейді грант иегері бізбен әңгімесінде.
Бүгінде жартылай дайын өнімге деген сұраныс жоғары. Себебі уақытының көп бөлігін жұмыста өткізетін әйелдер қауымының көпшілігі кешкі ас күтіп отырған отбасы мүшелеріне жылдам әрі тойымды ас әзірлеу үшін дүкендегі жартылай дайын өнімдерге жүгінетіні жасырын емес. Осындайда Фаризаның өнімдері көмекке келеді. Кәсіпкердің тоңазытқышынан тұшпара, мәнті, самса, котлет тағы да басқа тартылған таза мал етінен түрлі тағамдар, орама нан, қаттама нан, қайнатпа нан секілді мұздатылған нан түрлерін табуға болады. Жалпы жартылай фабрикаттардың оннан аса түрін күнделікті дүкендерге өткізіп отырады. Жалдамалы орында іс жасап жатқанына қарамастан екі адамды жұмыспен қамтыған екен.
– Жолдасым да жеке кәсіпкер. Қалалық жерден жеміс-жидек пен көкөністер алып келіп, базардағы сатушыларға көтерме бағада ұсынады. Қазір жалдамалы жерде тұрғандықтан табысымыздың бір бөлшегін орынға төлейміз. Әрине, кәсіп бірден өрге дөңгелеп кетпейтіні белгілі. Барлық кәсіпкердің басынан осы секілді қиындықтар өтетіні заңдылық. Табыс оңайшылықпен келмейді. Сондықтан алдағы жоспарымызда өз жеке орнымызды ашып, ешкімге тәуелді болмай табыс тапқымыз келеді, – дейді кейіпкеріміз.
Фариза Ермекқызының жартылай фабрикаттарынан бөлек, тіл үйірер бәліштері мен тәтті тоқаштары да көптің жүрегін жаулаған. Сонымен қатар сұранысқа орай ыстық ас дайындауды да жақында қолға алғалы отыр.
Осылайша, қайтарымсыз гранттың қайырын көріп, несібесін арттырып отырған кәсіпкер келіншек мемлекеттік қолдауға шексіз ризашылығын білдірді. Ал біз кейіпкеріміздің кәсібі өркендей беруіне тілек таныттық.
Балнұр Жексенбекқызы,
