ҚР Конституциясының 30 жылдығына орай аудандық Мәдениет үйінде «Заң және тәртіп» қағидаты аясында азаматтарды жеке сұрақтарымен қабылдау өтті.
ҚР Әкімшілік рәсімдік-процестік кодексінің 90 бабына сәйкес, мемлекеттік органдардың, жергілікті өзін-өзі басқару органдарының басшылары мен олардың орынбасарлары азаматтарды жеке және заңды тұлға өкілдерін айына кемінде бір рет, тиісті мемлекеттік органның басшысы бекіткен қабылдау кестесіне сәйкес жеке қабылдауға міндетті екені нақты көрсетілген. Бұл заңмен бекітілген жауапкершілік қана емес, сондай-ақ қоғаммен байланыс жасаудың жүйелі жолы. Қазіргі цифрландыру кезеңінде көп қызмет түрі онлайн форматқа көшкенімен, азаматтарды жеке қабылдап, мәселенің мән-жайын бетпе-бет отырып тыңдап, оның шешілу жолын түсіндірудің маңыздылығы жоғары. Бұл бір шетінен бұқара мен билік арасындағы ынтымақты, беріктікті, ашықтықты ұлғайтатыны да белгілі.
Жақында өткен азаматтарды қабылдау кезінде мәдениет үйінің дәлізінде ұзыннан қабылдау орындықтары орналастырылып, қарсы бетте аудандағы барлық бөлімдер мен органдардың өкілдері жеке сұрақпен жүгінген азаматтарға заң және тәртіп аясында өзекті мәселелері бойынша құқықтық кеңес беріп, түсіндірмелер жүргізді.
Заңдылық пен құқық тәртібін нығайтқан қабылдауда заңнамадағы олқылықтар, нормалардың жергілікті жерлерде тиімді қолданылмауы сынды өзекті мәселелер көтерілді.
Балнұр ЖЕКСЕНБЕКҚЫЗЫ.
