Шу өңірінің түкті топырағында дүниеге келген Серік Әденов – халқымыздың рухани қазынасына өлшеусіз үлес қосқан тұлға болатын. Қазақстан Республикасының Мәдениет қайраткері, сыршыл сазгер, өнегелі өнерпаз саналы өмірін өнерге арнаған жан. Ол қазақ музыкасын дамытуға, жас таланттарды тәрбиелеуге және ұлттық өнерді дәріптеуге елеулі үлес қосты.
Әденов Серік Әбдікерімұлының жүрегінен туған әуезді әндері тыңдарманның жан дүниесін тербетіп, халықтың ыстық ықыласына бөленгені белгілі. Оның әр туындысында туған жерге деген махаббат, ұлттық рух пен замана тынысы, іңкәрлік көркем көрініс табады.
22 тамыз күні Шу аудандық тарихи-өлкетану музейінде Серік Әденовке арналған арнайы бұрыш ашылды. Жаңа экспозицияда сазгердің өмірі мен шығармашылық жолынан сыр шертетін құнды деректер, фотосуреттер, марапаттары мен жеке заттары қойылды. Бұрышта сонымен қатар оның өнер жолындағы жетістіктері мен ұлттық мәдениетке қосқан үлесін айқындайтын материалдардың мол қоры жинақталған.
Көрнекті композиторға арналған бұрыштың ашылуында аудан әкімі Бақытжан Жәнібеков пен Қазақстан Журналистер одағының мүшесі Ахметжан Қосақов лентасын қиып, тағылымы мол сәттің тарихын жасады.
Сондай-ақ, салтанатты жиынға аудандық мәслихат төрағасы Жасұлан Әбенов пен «Amanat» партиясы аудандық филиалының төрағасы Болатхан Ниязбеков арнайы қатысып, қаламгердің мол мұрасы мен халыққа қалдырған ізгі істері жайлы жүрекжарды пікірлерін білдірді.
-Ауданымыздың зиялы қарты, сазгер Серік Әденовке арналған бұл бұрыш – туған жердің адал перзентіне көрсетілген құрмет қана емес, сонымен бірге кейінгі буынға ұлт руханиятының қадірін сезіндіретін, ой түйетін тағылымды орын болмақ. Мұндай шаралар ұрпаққа өнеге беріп қана қоймай, ел тарихының шынайы шежіресін жасайтыны анық.
Серік Әбдікерімұлы – туған жерінің мәдениет саласын дамытуға зор үлес қосқан тұлға. Оның әуендері мен әндері халық жадында сақталып, ұлттық руханияттың ажырамас бөлігіне айналды, – деді Бақытжан Оразалыұлы.
Ұрпақтарының айтуынша, бұл игі шара – жас ұрпақты өнерге баулу, сазгердің бай мұрасын дәріптеу және оның есімін мәңгі есте қалдыру жолындағы маңызды қадамдардың бірі.
Өңірге құрметті, ағайынға абыройлы, ауылға сыйлы майталман өзінің табанды еңбегі мен өнерге деген шексіз сүйіспеншілігінің арқасында көптеген шәкірт тәрбиелеп, олардың шығармашылық жолына бағыт-бағдар берді. Бүгінде сол шәкірттері елдің түкпір-түкпірінде ұстаз жолын жалғастырып, өнерге өз үлестерін қосып жүр. Өзіне өлшеусіз қызмет еткен оғландарын шуақты Шу өңірі де ұмытпасы анық.
Л.Маметаева,
Шу аудандық музейінің
кіші ғылыми қызметкері.
